Krasniqi: Çmimet për teatër një vlerësim institucional për artistët

Në një ceremoni solemne në Teatrin Kombëtar të Kosovës, Ministria e Kulturës, Rinisë dhe Sportit ka ndarë Çmimin Kombëtar për Vepër Jetësore në fushën teatrit dhe Çmimeve Vjetore për Teatër. Çmimi Kombëtar për Vepër Jetësore i është ndarë aktorit Istref Begolli (post-mortem). Ka qenë Ministri Krasniqi që ia ka ndarë këtë çmim vajzës së aktorit, Alba Begolli- Pashkut.

Në fjalën e tij Ministri Krasniqi ka vlerësuar lartë veprimtarinë e aktorit Begolli, duke thënë se ai ka lënë gjurmë të pashlyeshme në jetën teatrore në Kosovë.

“Rolet e tij monumentale, personaliteti i tij ka mbushur këtë sallë plot emocione, na ka bërë të gjithëve krenarë, e mbi të gjitha ka qenë dhe është frymëzimi i plot gjeneratave të aktorëve”, ka thënë ai, duke u shprehur i nderuar që tashmë personalitete të shquara të artit po nderohen në mënyrë institucionale.

Ndarja e Çmimit Kombëtar për Vepër Jetësore dhe Çmimeve Vjetore për Teatër, tha ministri Krasniqi, është një nderim por edhe një shtytës për gjeneratat e reja që të punojnë, pasi puna e tyre do të vlerësohet në mënyrë të merituar. Ai tha se përveç çmimeve në teatër, MKRS ka themeluar çmime edhe në fusha të tjera të artit, si në kinematografi, muzikë dhe arte vizuale.

Data 27 Mars është Dita Botërore e Teatrit. Ministri Krasniqi tha se kjo ditë tashmë jetën teatrore në vend po e gjen edhe me dy hapa të tjerë të rëndësishëm. “Teatri Kombëtar të Kosovës, për herë të parë si institucion i shtetit të Kosovës u anëtarësua me të drejta të plota në Konventën Evropiane të Teatrove, një institucion ky jashtëzakonisht i rëndësishëm për teatrin në mbarë Evropën. Tashmë artistët tanë të teatrit do të kenë plot mundësi që të përformojnë në skena të Evropës por edhe të shohin në Kosovë trupa teatrore nga shumë vende evropiane. Hap tjetër shumë i rëndësishëm është edhe hapja në Prishtinë e përfaqësisë së Institutit Ndërkombëtar të Teatrit. Këto dy të arritura dëshmojnë për depërtimin e suksesshëm të gjithë skenës sonë kulturore në ngjarjet më të mëdha të kulturës në botë”, tha ai, teksa ka shtuar se MKRS do të vazhdojë të mbështesë teatrin dhe gjithë komunitetin artistik, gjithnjë më qëllimin që puna e tyre të sjellë vlera të mirëfillta, që ata të jenë të lirë në veprimtarinë krijuese dhe që të mos kurrfarë ndikimesh.

Në kategoritë e tjera, çmimet kanë marrë: Çmimi vjetor për shfaqjen më të mirë për vitin 2012 i është ndarë shfaqjes “Nata e dymbëdhjetë” të Shekspirit në regji të Ilir Bokshit me produksion të Teatrit Kombëtar. Çmimi vjetor për regjinë më të mirë për vitin 2012 i është ndarë Fadil Hysajt për regjinë e shfaqjes “Shtëpia në ankand”. Çmimi për aktorin më të mirë për vitin 2012 i është ndarë aktorit Ismet Azemi, për rolin në shfaqjen “Vrasja e Mushkonjës” dhe Çmimi vjetor për prezantim të suksesshëm ndërkombëtar për vitin 2012 i është ndarë Shtëpisë teatrore “AKT” .

Pas pranimit të Çmimit , regjisori Fadil Hysaj tha se Kosova tashmë është bërë një vend ku artistët po krijojnë gjithnjë e më shumë hapësirë për të shprehur punën e tyre, të lirë. Ai ka vlerësuar lartë rolin e ministrisë për themelimin e këtyre çmimeve dhe për hapat e ndërmarrë që kanë quar drejt rritjes së mbështetjes për artistët tanë.

Aktori Ismet Azemi tha se ky çmim për të është një vlerësim shumë i rëndësishëm dhe i jep motiv atij që të japë edhe më shumë për jetën teatrore në vend.

Në ceremoninë solemne të ndarjes së çmimeve, me të cilën është shënuar edhe Dita Botërore e Teatrit, është lexuar edhe Deklarata për teatrin e përzgjedhur për këtë vit, e të cilën e ka dhënë shkrimtari dhe dramaturgu italian Dario Fo, fitues i çmimit nobel për letërsi në vitin 1997.

Bazuar në rregulloren për çmimet, laureati i Çmimit Kombëtar për Vepër Jetësore shpërblehet me 5 mijë euro. Ndërkaq në katër kategoritë e tjera shpërblimet janë nga 2 mijë e 500 euro. Juria për ndarjen e Çmimit Kombëtar për Vepër Jetësore në fushën e teatrit dhe çmimeve tjera vjetore, e emëruar nga Ministri i Kulturës, Rinisë dhe Sportit, Memli Krasniqi, ka pasur këtë përbërje: Emin Kabashi, Besim Rexhaj, Fatos Berisha, Naser Shatrolli dhe Mirsad Ferati.