Për thellim të bashkëpunimit kulturor dhe sportiv ndërmjet Francës dhe Kosovës
Zëvendësministri i Kulturës, Rinisë dhe Sportit, Gjergj Dedaj, ka zhvilluar një vizitë në Francë ku ka realizuar takime me zyrtarë dhe përfaqësues francezë dhe ka marrë pjesë në hapjen e Ekspozitës së Galerisë së Artit të Ferizajt në Villa le Grand të Francës.
Zëvendësi Dedaj është shoqëruar edhe nga Tahir Shabani, kryetar i Shoqatës për Bashkëpunim Franko-Shqiptar. Ata janë takuar me përfaqësues të komunës Villa la Grand, me të cilët diskutuan mundësinë e thellimit të bashkëpunimit në fushat që mbulon MKRS-ja.
Në vazhdën e takimeve, zëvendësministri Gjergj Dedaj është takuar edhe me deputeten e Parlamentit të Francës Virginie Duby-Muller, njëherazi anëtare e Komisionit për Kulturë, dhe me Marc Francini, kryetar i qytetit Evian dhe deputet i Parlamentit te Francës. Zëvendësministri i informoi përfaqësuesit francezë me të arriturat dhe sfidat e kulturës dhe sportit në Kosovë dhe vlerësoi se bashkëpunimi mes shteteve të Kosovës dhe Francës duhet të thellohet edhe më shumë përmes shkëmbimit të përvojave mes artistëve dhe sportistëve tanë.