Ëndrra e Rahovecianëve do përmbushet së shpejti, me përfundimin e palestrës sportive në këtë Komunë

Ministri i Kulturës, Rinisë dhe Sportit, Kujtim Gashi, priti sot në takim Kryetarin e Komunës së Rahovecit, Smajl Latifi. Në këtë takim, ministri Gashi e kryetari Latifi kanë nënshkruar memorandum bashkëpunimi për mbështetje financiare për projektin “Ndërtimi i palestrës sportive në Rahovec- faza e tretë”.

Memorandumi parasheh se Komuna e Rahovecit do të mbështetet financiarisht më vlerë prej 896,327.50 euro për finalizimin e ndërtimit të palestrës sportive, e cila do shërbejë për sportistët e kësaj treve.

“Në përputhje me zotimet tona si MKRS, do përmbushim mandatin tonë duke krijuar kushte në përmirësimin e infrastrukturës në sport”, u shpreh ndër të tjera ministri Gashi.

Ministri Gashi tha se këto investime po bëhen me qëllim të krijimit dhe avancimit të infrastrukturës sportive. “Pas këtyre investimeve të rinjtë e Rahovecit dhe sportistët e këtij qyteti do të kenë mundësi më të mira për realizimin e aktiviteteve të tyre sportive.

Ndërkaq kryetari i Rahovecit shprehu falënderim të veçantë për ministrin për nënshkrimin e këtij memorandum, duke e konsideruar këtë veprim të ministri Gashi si të shumë pritur për qytetarët e Rahovecit.