Kosova do ta kujtojë me pietet dhe nderim veprën e madhe të akademik Mark Krasniqit
E nderuara familje Krasniqi,
Me pikëllim të thellë mora lajmin për vdekjen e akademikut të çmuar, Mark Krasniqit.
Vdekja e akademik Mark Krasniqit është lajm pikëllimi e dhimbjeje për Kosovën, për kolegët, shkrimtarët dhe dijetarët.
Mark Krasniqi mbetet ikonë e Kosovës moderne, ndërsa puna e tij në fushën e kulturës, dijes, shkencës, letërsisë dhe të politikës, është jashtëzakonisht e madhe dhe si i tillë do të vlerësohet brez pas brezi.
Ai ishte një veprimtar dhe udhëheqës i devotshëm në rrugëtimin e shqiptarëve të Kosovës drejt lirisë, demokracisë dhe pavarësisë dhe bashkëpunëtor i ngushtë i themeluesit të shtetit tonë, presidentit historik të Kosovës, Ibrahim Rugova.
Me veprimtarinë letrare në fushën e poezisë për fëmijë, Krasniqi mbetet një autor i rëndësishëm i letërsisë shqipe, ndërsa me vargjet e shkruara me dashuri për jetën dhe të bukurën, ai u bë autor i lexuar.
Kosova do ta kujtojë me pietet dhe nderim veprën e madhe të akademikut, udhëheqësit dhe shkrimtarit, Mark Krasniqi.
Ngushëllime familjes, miqve dhe dashamirëve të akademik Mark Krasniqit!
Sinqerisht,
Kujtim Shala
Ministër i Kulturës, Rinisë dhe Sportit